Татарстанның «Ел инженеры» конкурсында җиңүчеләр Санкт-Петербург политехник университеты базасында стажировка узачак
2024 ел йомгаклары буенча «Ел инженеры» республика конкурсында җиңүчеләрне бүләкләп, Татарстан рәисе Рөстәм Миңнеханов аларның белем һәм күнекмәләренә ихтыяҗ булуын билгеләп үтте.
"Сез безнең сәнәгатьнең, Татарстанның киләчәге!", – дип ассызыклады ул.
«Ел инженеры» республика конкурсында җиңгән 55 кеше өчен, Санкт-Петербургның Бөек Петр политехник университеты инфраструктурасыннан файдаланып, Россия Федерациясе территориясендә урнашкан мәгариф оешмаларында квалификация күтәрү программалары буенча стажировка оештырылачак. Бу максатларга 7,9 млн сумнан артык акча юнәлдереләчәк.
Электрон аукцион уздыру турындагы мәгълүматны Татарстанның Сатып алулар буенча Дәүләт комитеты бастырып чыгарды. Заказ бирүче-республиканың сәнәгать һәм сәүдә министрлыгы.
«Практик инновацияләр һәм Промышленностьның R&D стратегик үсеше» темасына стажировка гомуми дәвамлылыгы 72 академик сәгать булган дистанцион һәм көндезге уку форматын берләштерәчәк. Программаның практик өлеше политехник университет инфраструктурасы белән танышуны, тармак партнерларының алдынгы инжиниринг һәм фәнни үзәкләрендә булуны күздә тота, анда катнашучыларга илебезнең инновацион чишелешләрен реаль шартларда куллануны күрсәтәчәкләр. Практик дәресләр һәм проект эше мөһим компонент булачак.
Конкурста җиңүчеләр өчен Санкт-Петербургка кадәр бару һәм кире кайту, Төньяк башкалада яшәү, туклану һәм трансфер оештыралар. Программа тәмамлангач, барлык стажерлар да дәүләт үрнәгендәге квалификация күтәрү турында таныклыклар алачак.