«Коррупциягә каршы сәясәт коралы буларак дәүләт заказы": ВШГМУДА белем бирү программасы старт алды
5-6 майда Казан федераль университетының Дәүләт һәм муниципаль идарә югары мәктәбендә «коррупциягә каршы сәясәт коралы буларак дәүләт заказы»темасына квалификация күтәрү программасы старт алды. Чараны ачу тантанасында республиканың Сатып алулар буенча дәүләт комитеты рәисе урынбасары Искәндәр Баһаветдинов, Татарстан Президенты каршындагы дәүләт хезмәте һәм кадрлар департаменты җитәкчесе урынбасары Андрей Беденьгов һәм югары мәктәп директоры урынбасары Наталья Аксенова катнашты.
Искәндәр Баһаветдинов тыңлаучыларга мөрәҗәгатендә игътибарны дәүләт сатып алулары процессында гадел конкуренцияне тәэмин итүнең мөһимлегенә юнәлтте.
"Контракт системасы сатып алуларның барлык катнашучылары арасында тигез хокук булдыруга юнәлдерелгән. Намуслы конкуренция принцибы һәм коррупциягә каршы көрәш безнең комитетның өстенлекле бурычлары булып тора. Без дәүләт һәм муниципаль сатып алуларның үтә күренмәлелеген һәм ачыклыгын тәэмин итәргә омтылабыз", - дип ассызыклады ул.
Программада катнашучылар Татарстан Республикасының Сатып алулар буенча дәүләт комитеты вәкиле Регина Мөхәммәтҗанова белән бергә Татарстанның Сатып алулар өлкәсендәге дәүләт сәясәтен өйрәнделәр. Алар гамәлдәге норматив актларны һәм төбәк хакимиятләренең дәүләт сатып алулары өлкәсендәге эшчәнлеген карадылар.
Илнар Магданов, ТР сатып алуларны үстерү үзәгенең сатып алу эшчәнлеген озата бару бүлеге җитәкчесе урынбасары, тыңлаучыларны сатып алу объектларын тасвирлау кагыйдәләре һәм контрактларның башлангыч максималь бәяләрен исәпләү ысуллары белән таныштырды. Катнашучылар шулай ук дәүләт сатып алуларында коррупция куркынычы һәм аларны минимальләштерү чаралары турында белем алачак.
«ТР сатып алуларны үстерү үзәге» АҖнең юридик бүлеге җитәкчесе Дарина Трошагина дәүләт һәм муниципаль контрактларны үтәүгә бәйле дәгъвалар һәм суд тикшерүләре алып бару тәҗрибәсе турында сөйләячәк.
Программада Коррупциягә каршы сәясәт мәсьәләләре буенча Татарстан Рәисе идарәсе, республика Хисап палатасы, Татарстан Финанс министрлыгының Казначылык департаменты вәкилләре һәм башка экспертлар чыгышлары каралган.
Укуның соңгы этабы аттестацион электрон тестлаштыруны үз эченә ала.