Яшь дәүләт хезмәткәрләре Дәүләт Советы эше белән танышты
Дәүләт Советының кече залында яңа гына эшли башлаган дәүләт һәм муниципаль хезмәткәрләр өчен семинар узды. Казан федераль университетының Дәүләт һәм муниципаль идарә югары мәктәбендә «яшь хезмәткәр мәктәбе» программасы буенча квалификация күтәрү курслары узучы республика министрлыклары һәм ведомстволары вәкилләре, муниципалитетлар аппаратлары хезмәткәрләре Татарстан парламенты эшчәнлеге белән таныштылар. Укучылар арасында-ТР Сатып алулар буенча дәүләт комитетының үзәкләштерелгән сатып алуларны анализлау һәм тәэмин итү бүлегенең әйдәп баручы белгече Фидан Шакиров.
Семинарны Дәүләт Советы Секретаре Лилия Маврина үткәрде. Курс тыңлаучыларына Дәүләт Советының закон чыгару эшчәнлеге, профильле комитетлар һәм комиссияләр, фракцияләр һәм депутат төркемнәре эше, парламентарийларның вәкаләтләре һәм аларның сайлау округларындагы эше турында мәгълүмат бирде. Ул халыкның тормыш сыйфатын күтәрү өлкәсендә хокукый гарантияләр тәэмин итүдә республика парламентының зур ролен ассызыклады.
Лекциядән соң тыңлаучылар өчен Парламент бинасы буйлап экскурсия үткәрелде, алар китапханәдә, утырышлар залында, делегацияләрне кабул итү залында һәм парламентаризм музеенда булдылар.
ТР Дәүләт Советы матбугат хезмәте материаллары буенча