Рөстәм Нигъмәтуллин: "Татарстанда кулланыла торган сатып алу механизмнары товар җитештерүчеләрнең географиясен сизелерлек киңәйтә»
Бүген Татарстан Республикасының Сатып алулар буенча Дәүләт комитетында ведомствоның 2025 елгы эш нәтиҗәләренә һәм 2026 елга планнарга багышланган йомгаклау коллегиясе узды. Чарада Татарстан Республикасы Премьер-министрының беренче урынбасары Рөстәм Нигъмәтуллин катнашты.
2025 ел нәтиҗәләре буенча контракт системасы турындагы законнар нигезендә бастырылган хәбәрләрнең гомуми күләме 301 миллиард сумнан артык тәшкил иткән. Республикада төзелгән контрактларның гомуми суммасы 311 миллиард сумнан артып китте. 6 миллиард сумнан артык бюджет акчасы янга калдырылган. Турыдан-туры Дәүләт комитеты тарафыннан 8 миллиард сумнан артык күләмдә 814 үзәкләштерелгән сатып алу уздырылган. Башкарылган сатып алуларның гомуми күләменнән контрактларның 80% ы республика башкаручы-тәэмин итүчеләр белән төзелгән.
Татарстан Республикасының Сатып алулар буенча Дәүләт комитеты рәисе Марат Зиатдинов үзенең докладында кече бизнеска ярдәмнең шактый артуын билгеләп үтте.
"Без кече эшмәкәрлек субъектларында сатып алулар структурасында сыйфатлы үзгәреш күзәтәбез. 2025 елда мондый контрактлар суммасы 96 миллиард сумга җитте, бу алдагы еллар күрсәткечләреннән шактый югары", - дип ассызыклады ведомство җитәкчесе.
Татарстан Республикасы Премьер-министрының беренче урынбасары Рөстәм Нигъмәтуллин дәүләт һәм муниципаль сатып алуларның нәтиҗәле системасы, бигрәк тә хәзерге икътисади шартларда, республика икътисадын үстерүнең төп инструментларының берсе булуын билгеләп үтте.
"Бүген дәүләт һәм муниципаль сатып алулар икътисадның аерылгысыз өлеше булып тора. Алар аша без эре инфраструктура проектларын гамәлгә ашырабыз, социаль институтлар, дәүләт органнары эшен тәэмин итәбез. Татарстанда кулланыла торган сатып алу механизмнары конкуренцияне үстереп кенә калмыйча, безнең товар җитештерүчеләрнең географиясен сизелерлек киңәйтә», – дип йомгаклады Рөстәм Нигъмәтуллин.
Киңәйтелгән киңәшмә азагында бүләкләү тантанасы булды.