Татарстан туризмы: туроператорларны, журналистларны һәм блогерларны кабул итүгә конкурс игълан ителде
Татарстан Республикасының дәүләт сатып алулары буенча дәүләт комитеты туроператорларны, журналистларны һәм блогерларны кабул итү буенча электрон аукцион игълан итте. Контрактның башлангыч максималь бәясе 5,6 миллион сумнан артык тәшкил итә. Заказ бирүче булып республиканың Туризм буенча Дәүләт комитеты тора.
Конкурс шартлары нигезендә, катнашучыларга Татарстанның истәлекле урыннары – Казанда, Болгарда һәм Зөядә экскурсия оештырырга тәкъдим ителә. Экскурсияләрне өч телдә: рус, инглиз һәм кытай телләрендә уздыру планлаштырыла.
Экскурсия хезмәтеннән тыш, башкаручылар кунакханәләрдә яшәү, туклану һәм транспорт белән тәэмин итәргә тиеш. Кунакларга сувенир сыйфатында презентацион савытта чәкчәк тапшырылачак.
Конкурста катнашуга гаризаларны 2025 елның 8 августына кадәр бирергә мөмкин.