Татарстанда экскурсоводларга һәм тәрҗемәче-гидларга аттестация узачак
Процедура ике этапта узачак — тестлар һәм аттестация комиссиясе утырышы белән.
Туризм буенча ТР Дәүләт комитеты Татарстан территориясендә эшчәнлек алып баручы экскурсоводларны һәм гид-тәрҗемәчеләрне аттестацияләүне оештыра. Чараны уздыру өчен электрон аукцион уздыру турында мәгълүматны ТР Сатып алулар буенча Дәүләт комитеты урнаштырды. Хезмәт күрсәтү заказ бирүчегә 1,4 млн сумга төшәчәк.
Аттестация ике этаптан торачак — тестлаштыру һәм аттестация комиссиясе утырышы. Тест 30 сораудан тора, аны үтәргә 120 минут вакыт каралган. Кимендә 23 дөрес җавап алынса, сынау үтелгән дип саналачак. Әңгәмә программасына 12 кешедән торган аттестация комиссиясенең кимендә 19 утырышы керә, ул бер утырыш дәвамында 25 кешедән артык кабул итмәячәк. Әңгәмә һәр катнашучыга 15 минутка кадәр дәвам итә.
Эшне башкару өчен башкаручыга тестлаштыруны һәм аттестация комиссиясе утырышын администрацияләү буенча хезмәтләр күрсәтергә, процедураларны оештыру өчен бина һәм җайланмалар бирергә, күкрәк өсте идентификацион карталарын эшләү һәм бастыру буенча хезмәтләр күрсәтергә кирәк булачак. Соңгылары экскурсовод турында индивидуаль белешмәләрне, федераль реестрда теркәлү номерын, аттестатның гамәлдә булу вакыты тәмамлану датасын, экскурсоводка бирелгән номерны үз эченә алачак һәм экскурсоводны аттестацияләү турында Карар кабул ителгәннән соң биреләчәк.
Контрактны үтәү вакыты-ел ахырына кадәр. Электрон аукционда катнашуга гаризалар 2025 елның 19 февраленә кадәр кабул ителә.
Әйтергә кирәк, 2025 елның 1 мартыннан экскурсоводларны мәҗбүри аттестацияләү турындагы таләп үз көченә керә. Федераль закон нигезендә экскурсоводлар Дәүләт аттестациясен узган очракта гына хезмәт күрсәтергә хокуклы булачак.